Talningu atkvæða við þjóðaratkvæðagreiðslu um gildi laga nr. 1/2010 lauk kl. 19:00 hinn 7. mars. Samkvæmt skýrslum yfirkjörstjórna voru 229.977 kjósendur á kjörskrá og greiddu 144.231 manns atkvæði. Niðurstaða talningarinnar var að 2.599 svöruðu að lögin ættu að halda gildi en 134.397 að þau skyldu falla úr gildi. Ógild atkvæði voru 7.235. Þar af voru 6.744 seðlar auðir en 491 atkvæði var ógilt af öðrum ástæðum.

Landskjörstjórn skipaði í dag, 2. mars 2010, tólf einstaklinga sem umboðsmenn ólíkra sjónarmiða í einstökum kjördæmum við þjóðaratkvæðagreiðsluna laugardaginn 6. mars næst komandi, sbr. 9. gr. laga nr. 4/2010 um framkvæmd atkvæðagreiðslunnar.

Við fyrirhugaða þjóðaratkvæðagreiðslu 6. mars, um skilmála ríkisábyrgðar á láni út af ICESAVE-samningunum, verða mörk kjördæmanna tveggja í Reykjavík þau sömu og við síðustu alþingiskosningar 25. apríl 2009. Mörkin koma fram í auglýsingu frá landskjörstjórn nr. 346/2009. Á fundi landskjörstjórnar 5. febrúar var enn fremur ályktað að þeir sem búa erlendis en ber að taka á kjörskrá í Reykjavík svo og þeir sem eru óstaðsettir í hús í Reykjavík skuli einnig greiða atkvæði í sama kjördæmi og við síðustu alþingiskosningar. Þeir sem tilheyra þessum hópum og eru fæddir 1. til 15. hvers mánaðar greiða atkvæði í Reykjavíkurkjördæmi suður en þeir sem eru fæddir 16. dag mánaðar eða síðar greiða atkvæði í Reykjavíkurkjördæmi norður.